តើអ្នកធ្លាប់មានអារម្មណ៍ថា ចង់ឱ្យផ្ទះរបស់អ្នកមានបរិយាកាសស្រស់ស្រាយ មានជីវិតជីវ៉ា និងពោរពេញដោយភាពវិជ្ជមានដែរឬទេ? មិនបាច់ស្វែងរកឯណាឆ្ងាយទេ ចម្លើយគឺស្ថិតនៅលើរុក្ខជាតិម្យ៉ាងដែលមានសម្រស់លេចធ្លោ និងផ្ដល់នូវក្តីសុខរាល់ពេលយើងបានគយគន់មើល ផ្កាមួយប្រភេទនោះគឺមានឈ្មោះហៅថា (Tecoma stans) ឬដែលយើងនិយមហៅថា «ផ្កាភួងម៉ាឡៃ»។
មាតិកាអត្ថបទ
នេះជារុក្ខជាតិលម្អដ៏អស្ចារ្យមួយ ដែលគ្រប់ផ្ទះគួរតែមានដាំយ៉ាងហោចណាស់មួយដើម។ មកដឹងពីហេតុផលដែលធ្វើឱ្យផ្កាមួយប្រភេទនេះ ក្លាយជាមិត្តដ៏ល្អបំផុតសម្រាប់សួនច្បារ និងគេហដ្ឋានរបស់អ្នក៖
១. សម្រស់លេចធ្លោ ផ្ដល់ពន្លឺប្រណីតដល់គេហដ្ឋាន
ផ្កាប្រភេទនេះ មានលក្ខណៈពិសេសត្រង់ថាផ្កាពណ៌លឿងទុំ រាងដូចត្រែ ឬកណ្ដឹងតូចៗ ដែលរីកស្គុសស្គាយកាត់នឹងស្លឹកពណ៌បៃតងស្រស់។ ទោះបីជាផ្ទះរបស់អ្នកមានទំហំប៉ុនណាក៏ដោយ គ្រាន់តែមានវត្តមាននៃពណ៌លឿងដ៏ស្រស់ស្អាតនេះ វានឹងជួយលើកសម្រស់សួនច្បារផ្ទះទាំងមូលឱ្យមើលទៅថ្លៃថ្នូរ ស្រស់ស្រាយ និងទាក់ទាញភ្នែកភ្ញៀវ និង អ្នកដំណើរឆ្លងកាត់ភ្លាមៗ។
២. បង្កើតអារម្មណ៍ស្រស់ស្រាយ និងកាត់បន្ថយភាពតានតឹង
ពណ៌លឿង គឺជាពណ៌នៃក្តីសង្ឃឹម ថាមពល និងភាពរីករាយ។ រាល់ពេលដែលអ្នកត្រឡប់មកពីធ្វើការហត់នឿយ ឬក្រោកពីគេងនៅពេលព្រឹក គ្រាន់តែបានសម្លឹងមើលផ្កាភួងម៉ាឡៃដែលមានពណ៌លឿងកំពុងរីកចាំងជះនឹងពន្លឺថ្ងៃ វានឹងជួយកាត់បន្ថយភាពតានតឹងក្នុងអារម្មណ៍ ផ្ដល់នូវភាពស្ងប់សុខខាងផ្លូវចិត្ត និងបំពេញថាមពលវិជ្ជមានសម្រាប់ថ្ងៃថ្មី។ វាមិនមែនគ្រាន់តែជារុក្ខជាតិទេតែជា «ឱសថចិត្តសាស្ត្រ» នៅក្នុងផ្ទះរបស់អ្នក។
៣. ងាយស្រួលដាំ ធន់នឹងកម្តៅថ្ងៃ និងរីកផ្កាពេញមួយឆ្នាំ
ចំណុចដែលធ្វើឱ្យគ្រប់គ្នាស្រឡាញ់ផ្កាមួយនេះបំផុតនោះគឺ ភាពរឹងមាំរបស់វា។ វាជារុក្ខជាតិដែលចូលចិត្តពន្លឺថ្ងៃខ្លាំង ធន់នឹងអាកាសធាតុ ក្ដៅហួតហែង និងមិនទាមទារការថែទាំស្មុគស្មាញឡើយ។ អ្វីដែលកាន់តែពិសេស គឺវាផ្ដល់ផ្ការីកជារៀងរាល់ថ្ងៃ និងពេញមួយឆ្នាំ មិនថារដូវប្រាំង ឬរដូវវស្សាឡើយ ពោលគឺផ្ទះរបស់អ្នកនឹងមិនចេះខ្វះពណ៌សោភ័ណភាពនោះទេ។
៤. ទាក់ទាញធម្មជាតិជុំវិញខ្លួន
នៅពេលដែលអ្នកដាំផ្កាភួងម៉ាឡៃនេះ ផ្ទះរបស់អ្នកនឹងក្លាយជាជម្រកដ៏រីករាយសម្រាប់បក្សីតូចៗ មេអំបៅ និងសត្វឃ្មុំ ដែលនាំគ្នាមករកលម្អងផ្កា។ សំឡេងបក្សីយំតិចៗ និងរូបភាពមេអំបៅហើររេរាំជុំវិញផ្កាពណ៌លឿង នឹងបង្កើតបានជាទិដ្ឋភាពធម្មជាតិដ៏រស់រវើកមួយ ដែលធ្វើឱ្យគេហដ្ឋានរបស់អ្នកមានក្តីសុខដូចរមណីយដ្ឋានផ្ទាល់ខ្លួន។
៥. អាចរៀបចំបានគ្រប់ទម្រង់តាមចំណូលចិត្ត
មិនថាអ្នកមានសួនច្បារធំទូលាយ ឬមានត្រឹមតែរ៉ាបេរ៉ង (Balcony) តូចមួយនៃផ្ទះល្វែងនោះទេ អ្នកនៅតែអាចដាំវាបាន។ ផ្កាលឿងដ៏ស្រស់ស្អាតមួយនេះ យើងអាចដាំនៅក្នុងផើងក៏បាន ដាំផ្ទាល់ដីធ្វើជារបងផ្កាក៏បាន ឬកាត់តម្រឹមវាឱ្យទៅជាដុំពកមូលៗមើលទៅគួរឱ្យស្រឡាញ់ក៏បាន ទៅតាមការច្នៃប្រឌិតរបស់អ្នក។ តាមដែលខ្ញុំចំណាំមើលប្រសិនបើបានដាំផ្ទាល់ដី ដើមនេះនឹងរីកលូតលាស់កាន់តែធំ ផ្កាក៏ច្រើនផងដែរ។
លើកតម្លៃជីវិតរស់នៅ ចាប់ផ្តើមពីផ្កាមួយដើម
ផ្ទះមិនមែនគ្រាន់តែជាកន្លែងស្នាក់នៅឡើយ តែជាកន្លែងផ្ទុកនូវក្តីសុខ និងការសម្រាកកាយ។ ការបន្ថែមផ្កាលំអទៅក្នុងគេហដ្ឋានរបស់អ្នក គឺជារឿងដ៏ល្អបំផុតមួយដែលអ្នកអាចធ្វើបានសម្រាប់ខ្លួនឯង និងក្រុមគ្រួសារ។ សម្រស់ប្រចាំថ្ងៃ និងថាមពលដ៏ស្រស់បំព្រងរបស់វា នឹងធ្វើឱ្យអ្នកលង់ស្រឡាញ់ផ្ទះខ្លួនឯងកាន់តែខ្លាំងឡើងរាល់ថ្ងៃ។
កុំរង់ចាំរហូតដល់ថ្ងៃស្អែក! ស្វែងរកដើមផ្កាភួងម៉ាឡៃមួយដើមមកដាំនៅចុងសប្តាហ៍នេះ ដើម្បីកែប្រែបរិយាកាសផ្ទះរបស់អ្នកឱ្យក្លាយជាឋានសួគ៌តូចមួយដ៏ស្រស់ស្អាត។
